Si Cepet di Utan Tagak

Oleh: Dwikki Ogi Dhaswara, S.Sos., M.M (Pamong Budaya DINDIKBUD Kab. Bangka Selatan) Minggu, 11 Oktober 2026,  18:01 WIB

Ayam Jambang VS Lutung (Sumber: MetaAi)

Di dalem utan Tagak Toboali, iduplah Ayam Jembang yang tegep. Bulu-bulu e warna abu-abu ade rintek-rintek item, ngelinyau men tenga kenek mateari. Ayam Jembang ni paling ken cepet jalan e di utan tu. Hayap a libar men tenga terbeng, kuat pulik weh ngipek e cepet cem ge angen.

Dak jao dari tu, di atah batang-batang tinggi, ade hikuk Kera Lutung yang lincah. Bulu e item lebet muet e hampir dak keliet agik men tenga deket daun-daun gelep. Kera Lutung ni paling hebat naik batang. Tangan e kuat ken ikor e yang panjang ngeheneng die berayun dari batang ke batang lain e.

Tiep kalik isak keben ini ketemu, Lutung gelem ngulok Jembang. “Woi, yang paling cepet lumpat! Cube liet ku!” kate e hare berayun cepet di atah kepale Jembang. “Ka hanye pacak di tanah! Men dihuro ngenaek batang, pasti ken jatoh! Ha ha ha!”

Jembang dak nyawet aben cakap e, cuma di dalem ati e, die ngerase kesel.

Lutung taken-taken e ngeluncat turun di adep e. “Yo kite bukti, hape yang lebe hebat!” tantang Lutung. “Kite adu cepet di utan Tagak ni hampai nyeberang ke Hungai Tagak di ujung hane!”

Jembang hekejep berenti jalan e. “Dok yo lah, kite nyube e, Lutung.”

“Waw, cuma ade syarat e!” kate Lutung hare bebinar mate e. “Ka dak jadi terbeng ok helame kite beradu ne!”

“Oke,” jawab Jembang. “Cuma ka dak jadi uge nginjek tanah helame kite beradu ni!

Keben tu hepakat ken beradu e pun dimulai!

Jembang langsung ngeleset cepet. Kaki e yang kuat nyurung badan e ngeliwet jalan hetapak. Cuma utan Tagak tekenal ken hemek-hemek e yang lebet. Hemakin jao die lumpat, hemakin tinggi ken rapet hemek tu. Duri-duri kecet nyakar bulu-bulu e yang alus. Die nek dak nek ngelambat ken nyarik celah di antara hemek yang beduri.

Hementara tu, Lutung nue gesit e berayun dari batang ke batang lain e. Tangan e paling ken kuat nyerangkem dahan-dahan batang. Awal e die begerek cepet, Cuma hemakin jao, jarak e antara batang ke batang lain hemakin jao uge. Berape kalik die hampir dak pacak nyapai dahan lain e ken begantung lame nunggu hejenek hebelum berasil nyapai e.

“Woi, Si cepet lumpat! Di mane ka e?” hurak Lutung pas ngeliet Jembang tenga bejuang ngeliwet hemek-hemek beduri. “Liet, ku lah jao di adep ka!”

Jembang dak nyerah. Die terus lumpat ken nue hemanget e, walau bulu-bulu e lah tekusut ken kaki e tegures. “Asak kawa pasti pacak!” hebet e.

Pas lah jao pejalen e, akhir e keben tu hampai di tepi Hungai Tagak. Hungai tu nue

libar ken aik e ngalir deres. Due-due e berenti, hame-hame keleten.

Lutung begantung di batang, men Jembang bediri di tepi hungai, keben tu bedeket, hikuk di atas hikuk di bawah, cuma keben tu bingong cemane nyeberang hungai yang nue libar a tu.

Dak jao dari tu, Lutung ngeliet hebatang bulo panjang ngelintang deket keben tu lah. “Liet! Ade bulo!” kate e. “Cemane men kite main teka-teki! Hape yang menang, die berhak makai bulo tu tuk nyeberang!”

Jembang hetuju pulik. Hude e Lutung merek teka-teki yang haro, “Hewan ape lah yang paling kayo?”

Jembang mikir hejenek, die cak-cak bingong. Dak lame hude tu, Jembang ngenjawab, ”Ha ha ha, tu pe gampang, hewan yang paling kayo tu BERUANG, mese e die banyak duet e hame cem name e Ber...Uang...!”

Lutung tekejot nenger jawab bener dari Jembang.

“Weee ken, aoklah cem tu, ka pulik yang merek ku pertanyaan teka-teki, cuma men ku pacak nyawab a bearti kite imbang ok, kite ulang pulik hampai ade yang menang!” hebut Lutung hare kesel.

“Oke! Hewan ape pagi-pagi lah berucen, pas malem die tiduk di batang, hape lah die?” tanyak Jembang hare ngeringeng.

Nenger pertanyaan tu, Lutung ngeringeng ken hemanget ngejawab e, “Gampang tu, Burung lah pasti e!”

“Emmm, salah!” Hawet Jembang

“Nah ape jadi e?” tanyak Lutung hare heran.

“Oke, bearti ka kalah ok! Jawab e LUTUNG, ha ha ha!” Jawab Jembang hare ketabe nue.

“Ape-ape ka ne, macem mane pacak aku?” tanyak Lutung hare kesel.

“Pagi ini ku lah kenek rucen dari ka, ka mese behibuk ken urang, paling maju ngusek urang?” hawet Jembang hare menceleng ngeliet Lutung.

Lutung jadi ketaket ngeliet mate Jembang. “Aoklah wah men cem tu.” Hambut Lutung hare mueng muke e.

Jembang jadi e yang menang. Die begeges ngedeket batang bulo tu ken nyube ngangket e. Cuma die dak ade tangan cem Lutung. Jungor e yang rancung dak pacak ngenggem bulo yang panjang ken berat tu, kaki e yang kuat hanye pacak nyurung, ukan ngangket, itu pun dak begerek aben lah.

Lutung nue ketabe e. “Ha ha ha! Liet lah! Ka dak ken pacak muik e ne! Mimang nian lah ka hanye pacak lumpat lah gawe e!”

Jembang ngerase malu nenger e. Die berusaha hekuat tenago, tapi bulo e teteplah berat.

Dak lame, langet lah jadi mendung. Ujan lebet pun turun ari tu. Aik hungai yang lah deres kini e jadi hemakin besak ken ngeluap. Aik lah mulai naik ke darat, muet banjir kecet di hekitar keben tu.

Batang yang ditamak lutung mulai mireng ken rubo, mese e tanah tekikis aik.

“Tulong!’ Hurak Lutung.

Dak de pikir panjang agik, jembang ngelupak aturan awal e. Die tepakso terbeng nulong lutung yang hampir anyot dibuik aik.

Lutung cepet-cepet nyapai kaki Jembang untuk berentun. Jembang narek lutung ke arah bulo panjang tadi.

“Cube paseng bulo e jadi jeramba tuk k nyeberang!” usul Jembang.

Hame-hame keben tu berasil maseng bulo tu. Lutung jadi gampang bejalan nyeberang e.

Jembang agik di heberang hane tunggu e. “Terbeng lah, dak usah ka pikir agik yang penting kite helamet!” kate Lutung.

Jembang pun ngangguk. Gampang die terbeng nyeberang hungai e, pas ngedarat di perimpeng Lutung.

Keben tu duduk behandar di bawah batang besak, betedo dari ujan. Keben tu hame-hame ketabe hare hame-hame minta maaf.

Hude ari tu, Lutung dak hua agik ngulok Jembang. Keben tu lah paham kalau ade kekurangan ukan ken haling ngerendah, tapi muet haling ngelengkep. Rase bekawan e lebe beharge dari pada menang pas beradu.

TAMAT